ဟက်ကာများကြောင့် အင်တာနက်လုံခြုံရေး တိုးမြှင့်သင့်ကြောင်း သုံးသပ်မှုများရှိ

From : ခေတ်လူငယ်ဦးတည်ရာမဲ့ တိုက်ခိုက်လျက်ရှိသည့် ပြည်တွင်းပြည်ပရှိ ဟက်ကာအချို့ကြောင့် အင်တာနက် အသုံးပြု သူများ၊ ဝက်ဘ်ဆိုက်တည်ထောင်သူများ၊ ဌာနဆိုင်ရာများ အနေဖြင့် အင်တာနက် လုံခြုံရေးဆိုင်ရာ ကာကွယ်မှုများကို ပိုမိုတိုးမြှင့်သင့်ပြီဖြစ်ကြောင်း လုံခြုံရေးဆိုင်ရာ ကျွမ်းကျင်သူများနှင့် နည်းပညာ အသိုင်းအဝိုင်းမှ ပညာရှင်များက သုံးသပ်ပြောကြားသည်။ “အခြေအနေက ပြည်တွင်းမှာ စိုးရိမ်စရာ အကောင်းဆုံးအချိန်လို့ ပြောလို့ရတယ်။ တိုက်ခိုက်တဲ့သူတွေက သူတို့ Internet User ကို တိုက်ခိုက်ချင် တာလား၊ အစိုးရ ဒါမှမဟုတ် အဖွဲ့အစည်းတွေကို တိုက်ချင်တာလား မသိဘူး။ ဘာရည်ရွယ်ချက်မှ မရှိဘဲ လုပ်တာတွေ တွေ့ရတယ်။ အဆိုးဆုံးက User နဲ့ Admin တွေပဲ။ တော်တော်များများ ကိုယ့်အီးမေးလ်၊ ကိုယ့်ဝက်ဘ်ဆိုက်မှာ အခြေခံကာကွယ်မှုတွေ ရှိသင့်တယ်ဆိုတဲ့ Awareness တောင် မရှိကြဘူး” ဟု လက်ရှိ တိုက်ခိုက်နေမှုများ အပေါ် နိုင်ငံတကာအသိအမှတ်ပြု MST သင်တန်းကျောင်းမှ ပညာရှင် တစ်ဦးက ပြောသည်။
ပြီးခဲ့သည့် ၂၀၁၀ နောက်ပိုင်းမှ စတင်၍ ပြည်တွင်းရှိ ဝက်ဘ်ဆိုက်များ၊ User တစ်ဦးချင်းထံ တိုက်ခိုက်မှုများမှာ ဆက်တိုက်ဖြစ်ပွားလာရာ တဖြည်းဖြည်းနှင့် အကျိုးမဲ့တိုက်ခိုက်လိုသူ အရေအတွက်မှာ ပိုမိုများပြားလျက် ရှိနေကြောင်း မြန်မာနိုင်ငံ ကွန်ပျူတာပညာရှင်အသင်းမှ အမှုဆောင်ကော်မတီဝင် တစ်ဦးဖြစ်သူ ဦးအောင်ဇော်မြင့်က ပြောသည်။ လက်ရှိ ပြည်တွင်း User များ တိုက်ခိုက်ခံရမှုများတွင် Virus ပါဝင်သည့် Link များ ပေးပို့ခြင်း၊ ဥပမာအားဖြင့် Gmail, G talk ကျော်ဝင်နိုင်သည့် ဝက်ဘ်ဆိုက်များ ဝေမျှပေးခြင်းဖြင့် တိုက်ခိုက်ခြင်းဖြစ်ပြီး ယင်းပုံစံမှာ နိုင်ငံ အများစု

မှ ဟက်ကာများ ကျင့်သုံးသည့် Phishing စနစ်ဖြစ်ပြီး ယင်းတိုက်ခိုက်မှုကို ခံရပါက မိမိ၏ E-mail မှတစ်ဆင့် Facebook, Twitter များမှ မိမိ၏ စာမျက်နှာများကို ထိန်းချုပ်နိုင်ခြင်း၊ Post လုပ်နိုင်ခြင်း၊ Share လုပ်ခြင်းများအထိ ထိန်းချုပ်နိုင်ကြောင်း သိရသည်။ နည်းအမျိုးမျိုး အသုံးချ၍ တိုက်ခိုက်လျက်ရှိသည့် ဟက်ကာများနှင့် ပတ်သက်၍ ၄င်းတို့၏ ရည်ရွယ်ချက်အား ပညာရှင်များက အမျိုးမျိုးသုံးသပ်ကြသည်။ တိုက်ခိုက်သူများတွင် အချို့က နိုင်ငံရေး အမြတ်ထုတ်ရန် တိုက်ခိုက်ခြင်း၊ အင်တာနက် အသုံးပြုသူများအား စိတ်ပိုင်းဆိုင်ရာ ထိခိုက်မှုများ ကြုံတွေ့စေရန် ရည်ရွယ်ခြင်းနှင့် အဆိုးရွားဆုံးမှာ ဟက်ကာအမည်ခံ၍ တိုက်ခိုက်လိုသူများအနေဖြင့် ပြည်တွင်းအင်တာနက် သုံးစွဲသူများ၏ အရည်အချင်းများ နိမ့်ကျစေရန်၊ အွန်လိုင်းကျွမ်းကျင်သူ အရေအတွက် နည်းပါးစေရန် ပြုလုပ်ကြခြင်းဖြစ်ကြောင်း ၂၀၁၂ ခုနှစ် ဇူလိုင်လ ၁၉ ရက်နေ့ထုတ် 7 Day News ဂျာနယ်တွင် ဖော်ပြထားပါသည်။Myanmar Express